BAGIAN IMAN

بسم الله الرحمن الرحيم

Ari iman kabagi kana tujuh bagian :

1.    Iman Lughatan,

2.    Iman 'Aqidatan,

3.    Iman Syahadatan,

4.    Iman Tamaman Wakamalan,

5.    Iman 'Alamatan,

6.    Iman Syar'an

7.    Iman Shufiyyatan.

1. Iman Lughatan,

Ari anu dimaksud ku iman Lughatan nyaeta; kadar-kadar percaya.

2. Iman 'Aqidatan,

Nyaeta iman ceuk tauhid anu ta'rifna :

(إِفْرَادُ اْلمَعْبُوْدِ بِالْعِبَادَةِ مَعَ اعْتِقَادِ وَحْدَتِهِ وَالتَّصْدِيْقِ بهِاَ ذَاتًا وَصِفَاتًا وَأَفْعَالاً)

“Nunggalkeun Dzat anu di'ibadahan/disembah bari neqadkeun kana sahiji dina Dzatna, sifatna jeung padamelannana.”

Lamun hiji jalma ngaku iman ka Alloh, tapi hatena masih tatagenan jeung nyarande ka lianti Alloh atawa boga tekad yen aya makhluq anu boga tapak gawe, maka batal imanna jeung batal 'ibadahna.

3. Iman Syhadatan,

Ari anu dimaksud ku iman syahadatan nyaeta iman anu sah di syahadatkeunnana, anu ngajadi rukun iman tur netepan kana ma'rifat jeung tashdeqna (Iddian jeung Qobulna). Iddi'an hartina ngakukeun yen Alloh pangeran abdi, Nabi Muhammad SAW utusan Alloh. Ari Qobul hartina narima kana sakabeh ajarannana rek mangrupa parentah atawa larangan.

4. Iman Tamaman Wakamalan,

Ari anu dimaksud ku iman Tamaman nyaeta anu kauger/kaasup kana katerangan anu aya dina kitab Syu'bul Iman, anu unggelna : "Ari panyampurna iman jeung alamat iman aya tujuh puluh tujuh cabang, pang luhurna ngucapkeun Laa Ilaaha Illallohu, pang entengna miceun pilara dijalan (atuh henteu kaasup iman anu sampurna lamun hiji jalma can ngalakukeun 77 cabang iman)".

5. Iman 'Alamatan,

 Ari anu dimaksud ku iman 'Alamatan nyaeta iman anu katembong cirina, diantarana nyaeta anu ngaiqrarkeun dua kalimah syahadat jeung sok ngalakonan amal sholeh, malahan seueur haditsna. Hadits anu nerangkeun kana ciri-ciri iman, diantarana :

{ مَنْ كَانَ يُؤْمِنُ بِاللهِ وَالْيَوْمِ اْلآٰخِرِ فَلْيَقُلْ خَيْرًا أَوْ لِيَصْمُتْ }

“Saha jalma anu iman ka Alloh jeung kana poe akhir maka kudu nyarita kalawan hade atawa repeh”.

6. Iman Syar'an

Ari anu dimaksud ku iman Syar'an sakumaha anu dicandak dina hadits Rosululloh ladang hasil dialog Kanjeng Nabi sareng malaikat Jibril, anu eta hadits katampi ti Umar RA, anu hartosna :" Naon ngaran iman ?", Rosul ngawaler :" Ari iman teh nyaeta kudu iman anjeun ka Alloh jeung ka pirang-pirang Malaikat Alloh, jeung kana pirang-pirang kitabna Alloh, percaya kana ayana poe akhir, percaya kana ayana papasten hade atawa goreng eta kabeh ti Alloh". Malaikat naros deui ka Rosululloh : " Iraha ari jadina Qiamat "?. Kanjeng Rosul ngawaler : " Nu naros langkung uninga batan anu ditaros".

7. Iman Shufiyyan.

Ari anu dimaksud ku iman Shufiyyannyaeta iman anu ladang ma'rifat ceuk tauhid, anu ngahasilkeun tilu rupa iman ;

1)   Iman 'Ilmul Yaqin,

Nyaeta jalma anu ngayakinkeun kana sifat Ilmu, Sama' jeung Bashorna Alloh, nepikeun ka eta kayakinan ngajadi rasa tegesna eta jalma anu boga rasa dirina disarengan ku Alloh, hatena lesot tina rasa diteuteup, didangu jeung ditingali ku Alloh, nepika ngarasa diri paduduaan jeung Alloh. Sanajan dirina campur gaul jeung batur tapi hatena tetep paduduaan jeung Alloh. Anak pamajikan anu dipikacinta  jeung dunya barana henteu matak jadi hahalang kana hatena tina eling ka Alloh.

2)   Iman Haqqul Yaqin,

Nyaeta jalma anu ngayakinkeun kana sifat Qudrot jeung Irodat Alloh, tegesna tetempoan ladang panon, dedengean ladang ceuli jeung sagala rupa anu karasa ku anggota badan dipake jembatan emas pikeun muhadloroh jeung Musyahadah ka Alloh. Dina harti panon nempo ka makhluq tapi hatena malatas nepi kanu ngadamelna eta makhluq (Alloh).  Jalma anu kieu maqomna disebut maqom Musyadah.

3)   Iman 'Ainul Yaqin.

Nyaeta jalma anu ngayakinkeun kana sifat Hayatna Alloh nepika boga rasa anu hirup teh ngan Alloh wumgkul. Atuh kabeh makhluq teh euweuh da anu aya mah ngan Alloh wungkul, tegesna henteu bisa eling ka makhluq sabab kahalangan ku eling ka Kholiqna.

Jalma anu karanjingan ku sifat Hayat cicing dina maqom Fana', jadina Majdub.

Urang kudu narekah jeung ngusahakeun sangkan iman urang naek, minimalna cicing dina iman Ilmul Yaqin maksimalna dina Haqqul Yaqin, tapi haram lamun narekahan hayang nepi kana iman 'Ainul Yaqin (nepi kana maqom Fana'/majbub), ngan lamun dipasihan ku Alloh langsung eta alus. Tapi haram ditarekahan , sabab jadi poho ka makhluq  jeung poho kana tugas diri ti Alloh nepika syareat jeung tugas ti Alloh kabangbalerkeun. 

 Daftar Isi